Կարդացին Հարուստ գործարարների կարիերայի աղքատ սկիզբը մի բան է վկայում․ կարևոր չէ, թե որտեղից եք սկսել, կարևոր է, թե ուր եք հասել։ Երկաթուղու աշխատողի և սպասուհու որդի Ամասիո Օրտեգան իսպանական հագուստի և աքսեսուարների խանութների ցանցի՝ ZARA-ի հիմնադիրն է: Օրտեգան բարձրագույն կրթություն չի ստացել։ Նա սկսել է իր գործունեությունը Իսպանիայում, երբ դեռ դեռահաս էր։
13 տարեկանում աշխատում էր որպես առաքիչ՝ շապիկների խանութի համար, որտեղ վաճառում էին հագուստ հարուստների համար։
Հետագայում Օրտեգան աշխատանքի անցավ գործվածքներ վաճառողի, ապա դերձակի մոտ։ Տեսնելով, թե ինչպես են գները աճում մինչ ապրանքը արտադրամասից հասնում է խանութ, նա հասկացավ, թե որքան կարևոր է ապրանքները անմիջապես գնորդներին հասցնելը՝ առանց միջնորդների։
Հետագայում նա օգտագործեց սա ZARA բրենդի օգտին։ Նա ղեկավարում էր արտադրության բոլոր քայլերը, որպեսզի կրճատի ծախսերն ու արագացնի արտադրության գործընթացը։
1960-ականների սկզբին Օրտեգան դարձավ տեղական հագուստի խանութի մենեջեր և հենց այստեղ նկատեց, որ միայն մի քանի հարուստ բնակիչներ հնարավորություն ունեն թանկ հագուստ գնել։ Նա սկսեց արտադրել նմանատիպ հագուստ, սակայն ավելի մատչելի, որը հասանելի կլիներ բոլորի համար։ Օրտեգան Բարսելոնայից գնում էր էժան հումք և ստվարաթղթե նմուշներ, որոնցից ձեռքով կտրում էր կտորները։
Գործարարն իր ապրանքները վաճառում էր տեղական խանութներին և հավաքում ստացված եկամուտը: Այսպիսով, 1963թ-ին՝ 27 տարեկանում Օրտեգան բացեց իր առաջին հագուստի արտադրամասը։
1975թ․ հիմնեց առաջին ZARA խանութը՝ մի հայտնի հանրախանութի մոտ։ Սա լավագույն վայրն էր, որը կարելի էր ընտրել նորաստեղծ բիզնեսի համար, քանի որ հանրախանութից օգտվող մարդիկ անպայման կմտնեին նաև նորաբաց հագուստի խանութ:
1989թ. Իսպանիայում կար ZARA բրենդի 100 խանութ։ Այսօր 2000-ից ավելի ZARA խանութներ բաշխված են աշխարհի 88 երկրներում։
Օրտեգան ինքնամփոփ ու գաղտնապահ է։ Նա չի տալիս հարցազրույցներ և ընկերությունն էլ սահմանափակ ինֆորմացիա է տրամադրում հիմնադիր-տնօրենի մասին։ Տասնամյակներ շարունակ միայն 1 լուսանկարիչ է աշխատում Օրտեգայի համար։
Օրտեգան պաշտոնական հանդիսություններին քիչ էր մասնակցում։ Երբ Իսպանիայի արքայազն Ֆիլիպը այցելեց Inditex-ի գրասենյակ, նրան դիմավորեցին Օրտեգայի ներկայացուցիչները։
Նա երբեք փողկապ չի կրում աշխատանքի ժամանակ։ Նույնիսկ այն օրը, երբ դարձավ Իսպանիայի ամենահարուստ մարդը, նա մեծ շուքով չնշեց այդ իրադարձությունը, այլ պարզապես գնաց աշխատանքի, ճաշեց ընկերության ճաշարանում և ադ ժամանակ 15 րոպե դիտեց հեռուստացույց, որով հայտնում էին, որ նա վաստակել է 6 միլիարդ դոլար:
Համաձայն Forbes ամսագրի՝ Օրտեգան աշխարհի 9-րդ և Իսպանիայի ամենահարուստ մարդն է։