Կարդացին Նախ վերհիշենք, թե ի՞նչ է կոնտենտը, ինչո՞վ է այն տարբերվում գովազդից: Բովանդակությունը կամ նույն ինքը կոնտենտը տարբերվում է գովազդից նրանով, որ այն պետք է օգտակար լինի հետևորդների համար և չպարունակի ամբողջությամբ վաճառք կատարելուն միտված հրապարակումներ:
Կոնտենտ-մարքեթինգը օգտակար և հետաքրքիր բովանդակության միջոցով նոր հաճախորդներ գրավելու լավագույն ձևերից է: Կոնտենտը ոչ գովազդն է, ոչ էլ ընկերների կողմից էջը խորհուրդ տալը: Կոնտենտը հենց բովանդակությունն է: Իսկ բովանդակությունը կարող է պարունակել.
- ցանկացած օգտակար տեքստ. հրապարակում սոցիալական ցանցերում, բլոգի գրառում, տեղեկատվության հրապարակում, հոդված, գիրք
- օգտակար և հետաքրքիր տեսանյութ
- ինտերակտիվ ծրագիր կամ ծառայություն, որն անվճար է
- շնորհանդես, որի ժամանակ հանդես եք գալիս օգտակար զեկույցով
- ուսուցողական դասընթաց, վեբինար, վարպետության դաս
Ինչպե՞ս դա անել: Նպատակն ու լսարանը:
Նախքան օգտակար տեքստեր գրելուն անցնելը, ոլորտով զբաղվողը փորձում է պատասխանել երկու հարցի.
- Ու՞մ եմ ուզում ներգրավել իմ գործողություններով:
- Ի՞նչ պետք է ներկայացնեմ իմ ընկերության մասին`հենց այդ մարդկանց ներգրավելու համար:
Սրանք պարզ հարցեր են, որոնց պատասխանները այդքան էլ հեշտ չէ գտնել, բայց հնարավոր է և անհրաժեշտ: Այդ հարցերի պատասխանից էլ կախված է, թե ինչ բովանդակություն է պետք հենց ձեր էջերին, ինչեր ներառել դրա մեջ և ինչպես չափել արդյունքը: Լսարանի վերլուծությունն ու հստակ առաջադրանքներն օգնում են սահմանել ձեր կոնտենտի թեմատիկ սահմաններն ու գնահատել արդյունավետությունը:
Բիզնեսի կոնտենտ-մարքեթինգի արդյունավետությունը դժվար է չափել կատարված վաճառքների միջոցով. մարդը դժվար թե օրինակ բլոգը կարդալուց անմիջապես հետո շտապի գնել ձեր առաջարկած ապրանքը: Բայց փոխարենը դուք կիմանաք, թե քանի մարդ է ընթերցել բլոգն ու իմացել ապրանքի մասին: Ուստի, նախքան կոնտենտ-պլան կազմելը պատասխանեք հետևյալ հարցերին. «Ովքե՞ր են հետևում իմ էջին» և «Ի՞նչ է պետք ասել նրանց»: