Կարդացին Կորոնավիրուսը գրոհել է աշխարհի շատ երկրներ, և ներկայումս հայտնաբերված չէ դրա բուժման եղանակը: Դժբախտաբար, շատ լրատվականներ շարունակ կեղծ առողջապահական խորհուրդներ են տալիս՝ սկսած անօգուտ, բայց համեմատաբար անվնաս մեթոդներից, մինչև իսկապես վտանգավորները:
BBC-ից հայտնում են, որ ուսումնասիրել են թե՛ օնլայն հարթակներում ամենատարածված պնդումները, թե՛ իրական գիտական պնդումները, և արդյունքում բացահայտել են այն 5 կեղծ առողջապահական միֆերը, որոնք ներկայացնում ենք ձեզ:
1. Սխտոր
Ֆեյսբուքում տարածված են բազմաթիվ պոստեր, որոնք խորհուրդ են տալիս սխտոր ուտել՝ կանխարգելելու համար վարակը:
ԱՀԿ-ն (Առողջապահության համաշխարհային կազմակերպություն) ասում է, որ այն «առողջ սնունդ է, որը կարող է ունենալ հակամանրէային որոշ հատկություններ», սակայն ապացույց չկա, որ սխտոր ուտելը կարող է պաշտպանել մարդկանց նոր կորոնավիրուսից:
Բազմաթիվ դեպքերում այդպիսի միջոցները վնասակար չեն, քանի դեռ դրանց հետևելով դուք չեք անտեսում՝ ապացույցների վրա հիմնված բժշկական խորհրդատվությունը:
South China Morning Post-ը հաղորդել է դեպք մի կնոջ մասին, որը պետք է հիվանդանոցային բուժում ստանա խիստ բորբոքված կոկորդի համար՝ 1,5 կգ հում սխտոր օգտագործելուց հետո:
Բոլորս գիտենք, որ միրգ, բանջարեղեն ուտելը և ջուր խմելը օգտակար են առողջությանը: Այնուամենայնիվ, ապացուցված չէ, որ մթերքի որևէ տեսակ կօգնի պայքարել որևէ վիրուսի դեմ:
2. «Հրաշք հանածոներ»
Յութուբեր Ջորդան Սաթերը, որն ունի հազարավոր հետևորդներ տարբեր հարթակներում, պնդում է, որ «հրաշագործ հանքային հավելանյութը», որը կոչվում է MMS, կարող է վերացնել կորոնավիրուսը:
Այն պարունակում է քլորի երկօքսիդ՝ սպիտակեցնող միջոց:
Սաթերը և մյուսները գովազդում էին այդ նյութը նույնիսկ նախքան կորոնավիրուսի բռնկումը, և հունվարին վերջինս Twitter- ում գրել էր, որ «քլորի երկօքսիդը (aka MMS) ոչ միայն կարող է պայքարել քաղցկեղի բջիջների դեմ, այլև կարող է վերացնել կորոնավիրուսը»:
Անցյալ տարի ԱՄՆ-ի Պարենի և դեղամիջոցի վարչությունը (FDA) նախազգուշացրեց, որ MMS խմելը վտանգավոր է: Այս մասին ահազանգել են նաև այլ երկրների առողջապահական մարմինները:
FDA-ն ասում է, որ «դեռ չկա որևէ հետազոտություն, որը ցույց է տալիս, որ այդ ապրանքներն անվտանգ են կամ արդյունավետ են ցանկացած հիվանդության բուժման համար»: Այն նախազգուշացնում է, որ դրանք խմելը կարող է առաջացնել սրտխառնոց, փսխում, լուծ և ուժեղ ջրազրկման ախտանիշներ:
3. Տնային՝ ձեռքերը մաքրող միջոցներ
Ձեռքի սանիտարական գելի պակասի մասին բոլորս գիտենք: Ձեռքերը լվանալը վիրուսի տարածումը կանխելու կարևոր միջոց է:
Երբ ի հայտ եկան դրանց պակասության մասին լուրերը, սոցիալական ցանցերում լրատվամիջոցները սկսեցին առաջարկել տնային պայմաններում պատրաստվող գելի բաղադրատոմսեր:
Բայց այս բաղադրատոմսերը նախատեսված են տարբեր մակերեսների ախտահանման համար և, ինչպես նշում են գիտնականները, նախատեսված չեն մեր մաշկի համար:
Ալկոհոլային հիմքով ձեռքի գելերը սովորաբար պարունակում են փափկեցնող նյութ, ինչի շնորհիվ ավելի քիչ են ազդում մաշկի վրա (60-70% ալկոհոլ):
Պրոֆեսոր Սալի Բլումֆիլդը պնդում է, որ ինքը չի հավատում, որ դուք տնային պայմաններում կարող եք ձեռքերը մաքրելու համար արդյունավետ արտադրանք պատրաստել: Նույնիսկ օղին ընդամենը 40% ալկոհոլ է պարունակում:
Իսկ մակերևույթները մաքրելու համար սովորական կենցաղային ախտահանիչները պետք է որ արդյունավետ լինեն, պնդում են ԱՄՆ հիվանդությունների վերահսկման և կանխարգելման կենտրոնները (CDC):
4. Ջուր խմել յուրաքանչյուր 15 րոպեն մեկ անգամ
Մի գրառում, որը պատճենվել և տեղադրվել է Facebook-ի բազմաթիվ հրապարակումներում: Մեջբերման հեղինակն էլ «ճապոնացի բժիշկն» է, ով խորհուրդ է տալիս խմել ջուր ամեն 15 րոպեն մեկ` ցանկացած վիրուս օրգանիզմից «վտարելու» համար: Արաբերենով այս վարկածով կիսվել են ավելի քան 250,000 անգամ:
Օքսֆորդի համալսարանի պրոֆեսոր Թրյուդի Լանգը ասում է, որ «գոյություն չունի կենսաբանական մեխանիզմ»՝ ի աջակցություն այն գաղափարի, որ դուք կարող եք շնչառական վիրուսը «տեղափոխել» ձեր ստամոքս և «սպանել» այն:
Կորոնավիրուսների պես վարակները մարմնի մեջ են մտնում շնչուղիների միջոցով, երբ շնչում եք: Նրանցից ոմանք կարող են մտնել բերանի խոռոչ, բայց նույնիսկ անընդհատ ջուր խմելը չի խանգարի վիրուսին:
Այնուամենայնիվ, ջուր խմելը, ընդհանուր առմամբ, լավ բժշկական խորհուրդ է:
5. Տաքանալ
Բազմաթիվ ենթադրություններ կան այն մասին, որ ջերմությունը սպանում է վիրուսը, ուրեմն պետք է տաք ջուր խմել, կամ տաք լոգանք ընդունել, կամ վարսահարդարիչ օգտագործել:
«Տաք ջուր խմելը և արևի ազդեցությունը կսպանեն վիրուսը» ևս մի գրառում է, որը պատճենվել և տեղադրվել է տարբեր օգտատերերի կողմից և կեղծ կերպով վերագրվել է Յունիսեֆին :
Unicef-ի աշխատակիցներից մեկը հայտնում է, որ սովորական գրիպը ամռանը չի կարողանում գոյատևել մարմնից դուրս, բայց դեռ հայտնի չէ, թե ինչպես է շոգն ազդում կորոնավիրուսի վրա:
Մենք գիտենք, որ գրիպի վիրուսը ամռանը մարմնից դուրս լավ չի գոյատևում, բայց մենք դեռ չգիտենք, թե ինչպես է ջերմությունն ազդում նոր կորոնավիրուսի վրա:
Արդյունավետ չէ մարմինը տաքացնելը կամ արևին տալը, այն հույսով, որ կազատվեք վիրուսից: Երբ վիրուսը գտնվում է ձեր մարմնում, այն սպանելու որևէ ձև չկա, ձեր մարմինը պարզապես պետք է պայքարի դրա դեմ:
Մարմնից դուրս՝ «վիրուսը սպանելու համար ձեզ հարկավոր է շուրջ 60C ջերմաստիճան,- ասում է պրոֆեսոր Բլումֆիլդը,-ցանկացած լոգանքից շատ ավելի տաք»:
60C-ով սպիտակեղենը կամ սրբիչները լվանալը լավ գաղափար է, քանի որ դա կարող է ոչնչացնել գործվածքների վրա ցանկացած վիրուս: Բայց դա լավ տարբերակ չէ ձեր մաշկը լվանալու համար:
Տաք լոգանք ընդունելը կամ տաք հեղուկներ խմելը չի փոխի ձեր մարմնի իրական ջերմաստիճանը:
BBC- ի մոնիտորինգի լրացուցիչ հետազոտություն