Կարդացին Որքա՞ն հաճախ եք դուք՝ ձեր սեփական կարիքներն ու ցանկություններն անտեսելով գնում այն, ինչ պետք է ձեր ամուսնուն կամ երեխաներին: Դուք խնայում եք ձեզ վրա, սակայն դա արդար չէ, հատկապես, երբ խոսքն այնպիսի իրերի մասին է, որոնց դեպքում խնայել չի կարելի: Ժամանակն է վերանայել այս սովորությունն ու դադարել ինքներդ ձեզ վրա խնայել: Սկսենք այն կարևոր իրերից, որոնց վրա չի կարելի խնայել:
Սանր
Կարելի է գնալ բարձրակարգ գեղեցկության սրահ, ներկել մազերը լավագույն ներկերով և լվանալ բարձորակ շամպուններով, բայց այս բոլոր ջանքերը լինեն ապարդյուն, եթե խնայեք սանրի վրա: Լավ սանրի ատամները և խոզանակները հարթ են, հակառակ դեպքում ամեն անգամ սանրվելիս դուք կվնասեք ձեր մազերը: Սանրի նյութը պետք է համապատասխան լինի ձեր մազերի տեսակին և կիրառման ձևին: Օրինակ, գանգուր մազերի համար հարմար են տարբեր երկարություններ ունեցող ատամները, իսկ յուղոտ մազերի համար իդեալական են բնական փայտից պատրաստված սանրերը:
Ավելին, տարբեր գործողությունների համար ձեզ պետք են տարբեր սանրներ: Մերսող խոզանակը կարող եք օգտագործել մազերի թափվելը կանխելու համար, սիլիկոնե սանրը՝ տաք վարսահարդարիչով մազերը չորանացնելու համար: Ի դեպ, մասնագետները վստահեցնում են, որ լվանալուց անմիջապես հետո մազերը սանրելը վնասում է մազերը: Մազերն ավելի քիչ կվնասվեն, եթե դրանք սանրեք չոր վիճակում և ընտրեք փայտից կամ պլաստիկից պատրաստված խոշոր ատամներով սանր:
Սանր ընտրելիս պետք է հաշվի առնել ոչ միայն հումքը, այլև՝ հատուկ հատկանիշներ: Սիլիկոնե խոզանակներն իդեալական են երկար մազերի համար, իսկ պլաստիկից պատրաստված ատամներով սանրերը՝ գանգուր մազերի համար: Հաճախ մաքրեք սանրը կուտակված մազերից և ստուգեք բոլոր ատամների առկայությունը: Նույնիսկ ամենափոքր վնասված կտորները կարող են վնասել մազերի մակերեսը, ուստի ավելի լավ է դեն նետել վնասված սանրը և գնել նորը՝ անպայման ուշադրություն դարձնելով որակին:
Բազային զգեստապահարան
Երբ գնում եք սպիտակ վերնաշապիկներ, առանց պրինտի շապիկներ, պարզ զգեստներ, ավելի լավ է մոռանալ «խնայողություն» բառի մասին և հիշել, որ գնում եք այնպիսի հագուստ, որն ամենաշատն եք կրելու առօրյայում և այս տեսակ հագուստը միշտ ակտուալ է: Նման հագուստը կարելի է կրել տարիներ շարունակ, երբ որակը լավն է: Բազային որակյալ հագուստ գնելը հուսալի ներդրում է, քանի որ դրանք դուրս չեն գալիս նորաձևությունից: Նախապատվությունը տվեք բնական, խիտ գործվածքներին:
Ընտրեք դասական մոդելներ և ձևեր, որոնք դուրս չեն գալիս նորաձևությունից, և գնեք միայն բարձրորակ հագուստ: Թող դրանք լինեն քիչ, բայց որակով: Ավելին,բազային հագուստը հնարավոր է համալրել տարբեր աքսեսուարներով և կրել տարբեր սեզոնների տարբեր հետաքրքիր ձևերով:
Տնային հագուստ
Որպես կանոն, տանը մարդիկ կրում են այն հագուստը, որն ափսոսում են նետել, սակայն որով փողոց դուրս գալն ամոթ է: Բոլոր այս սիրված, բայց լայնացած ու անպիտան շապիկներն ու սվիտերներն ազդում են մեր ինքնագնահատականի և տանեցիների վերաբերմունքի վրա: Նույնը վերաբերում է ներքնազգեստին: Ընտրելով թանկ մոդելներ՝ դուք ոչ միայն ուրախացնում ենք ձեզ, այլև՝ հոգ եք տանում ձեր սեփական մարմնի մասին:
Այսպիսով, հոգեբանները պնդում են, որ պետք է դեն նետել մաշված հագուստը և մենք պատճառ չունենք չհավատալ նրանց: Դիմադրեք տանը մաշված հագուստով կամ խալաթով մնալու գայթակղությանն ու տանը կրեք պարզ, հարմարավետ, զուսպ, բայց ոչ հին հագուստ: Տանը գեղեցիկ հագնվելով՝ դուք ենթագիտակցորեն ավելի լավ եք ձեզ գզում և գիտակցում եք, որ արժանի եք լավագույնին միշտ և ամենուր` թե աշխատավայրում, թե տանը՝ սպասք լվանալիս:
Այնպես որ պետք չէ խնայել տնային հագուստի վրա և պետք է կոկիկ ու խնամված լինել ձեր և ձեր ընտանիքի անդամների համար:
Տան դեկոր
Իրական կյանքը սկսվում է միայն այն բանից հետո, երբ մարդը կարգի է բերում իր տունը: Եվ ամենևին էլ պարտադիր չէ, որ այնտեղ լինեն շատ իրեր. կարևոր է, որ իրերը լինեն իրենց տեղերում և գոհացնեն տիրոջը: Լրացրեք ձեր սենյակն այն ամենով, ինչ ուրախացնում է ձեզ. մոմեր, ապակե գունավոր լամպ, նկարներ… Թող սենյակի տրամադրությունը ներդաշնակ լինի ձեզ հետ, և տանը դուք միշտ կունենաք հարմարավետության զգացում:
Տանը պետք է լինի անձնական տարածք՝ փոքր անկյուն, որտեղ օրվա վերջում ուզում ես վայելել հանգիստդ: Ձեր ընտրած գույները, իրերը և փոքրիկ դեկորներն ազդում են ձեր տրամադրության վրա: Ընտրելով միայն այն, ինչ էժան է, դուք չեք կարող ստեղծել ձեր երազած ինտերիերը: Մի խնայեք ինքներդ ձեզ և ձեր հարմարավետ, գեղեցիկ միջավայրի վրա:
Սպիտակեղեն
Անկողնային պարագաների վրա խնայելը ձեզ վրա ավելի թանկ կնստի, քանի որ այս դեպքում խոսքը միայն տեսքի մասին չէ: Ենթադրենք, որ դուք գնել եք լավ ներքնակ և նույնիսկ հարմար օրթոպեդիկ բարձ, բայց մի մոռացեք, որ հենց սպիտակեղենն է դիպչում մաշկին: Կոշտ կարերը կարող են քերել մաշկը, արհեստական գործվածքը կարող է ալերգիա առաջացնել, և անգամ կարող են սպիտակեղենի մակերևույթին առաջանալ մակաբույծներ: Մարմնին հաճելի, ամուր, բայց միևնույն ժամանակ փափուկ և շնչող սպիտակեղենը չի կարող էժան լինել, իսկ մեկ լավ հավաքածուն բավարար չէ, քանի որ հարկավոր է այն փոխել առնվազն 10 օրը մեկ անգամ:
Կյանքի մեկ երրորդը մարդիկ անցկացնում են անկողնում: Ուրեմն այն ամենը, ինչը նպաստում է լավ քնին, պետք է գնել առանց ափսոսելու` մահճակալ, բարձեր, վերմակ և սավաններ: Չնայած նրան, որ նախնական ծախսերը կարող են մեծ թվալ, եթե բաժանեք այդ ծախսերը օգտագործման ժամկետին (իսկ լավ սպիտակեղենը երկար է ծառայում), ստացվում է բավականին էժան: Առավել ևս, որ խոսքը ձեր կյանքի մեկ երրորդի մասին է, որը դուք անցկացնում ենք քնած: Ուրեմն, թող այդ քունն անցնի առավելագույն հարմարավետ պայմաններում:
