Կարդացին Խոստովանենք, որ կորոնասվիրուսը շատ սովորություներ է փոխել մեր առօրյայում: Կորոնավիրուսի տարածման ֆոնին փոխվում են նաև մեր՝ առօրյա իրերի մակերեսը մաքրելու ստանդարտ եղանակները:
Կորոնավիրուսի կանխարգելման համար անհրաժեշտ է ձեռքերը միշտ մաքուր պահել և չդիպչել ձեր դեմքին՝ հատկապես մարդաշատ վայրերում: Իսկ ինչպե՞ս ախտահանել սմարթֆոնները, չէ՞որ հեռախոսն ականջին դնելով՝ մենք վտանգում ենք ինքներս մեզ: Կօգնի միայն մանրակրկիտ ախտահանումը, որի շնորհիվ կկարողանաք նվազեցնել ձեր իսկ բջջային հեռախոսից վարակվելու վտանգը:
Սմարթֆոնը, ինչպես ցանկացած մետաղական, ապակե կամ պլաստիկ մակերես, կարող է իսկապես լինել կորոնավիրուսի կրող: Համաձայն Journal of Hospital Infection-ի՝ առարկաների մակերևույթների վրա վիրուսը կարող է գոյատևել մինչև 9 օր:
Գաջեթները ախտահանելու համար Google-ը և Apple-ը սովորաբար խորհուրդ են տալիս օգտագործել թեթև օճառաջրով թրջած չնկերված՝ այսինքն անգույն, սպիտակ կտոր: Այնուամենայնիվ, կորոնավիրուսային պանդեմիայի ֆոնին ստանդարտ ցուցումներում որոշ փոփոխություններ կատարվեցին: Մասնավորապես, խորհուրդ է տրվում օգտագործել 70% ալկոհոլային լուծույթով անձեռոցիկներ:
Նախկինում արգելված էր ալկոհոլը և կենցաղային մաքրող միջոցներն օգտագործել գաջեթների մակերեսները մաքրելու համար, քանի որ դրանք կարող էին վնասել էկրանի օլեոֆոբային ծածկույթը: WSJ- ի լրագրող Յոհաննա Շթերնը որոշեց ստուգել, թե արդյո՞ք ալկոհոլային ու այլ մաքրող միջոցները կարող են վնասել,էկրանը, թե՝ ոչ. վերջինս iPhone 8-ի էկրանը սրբեց Clorox ախտահանող անձեռոցիկով ավելի քան 1000 անգամ և որևէ փոփոխություն չնկատեց:
Նա կանգ չառավ անձեռոցիկներով. Շթերնը փորձեց մաքրել էկրանը զուգարանը մաքրող նյութով, որի բաղադրության մեջ մտնում է նաև հիդրոքլորաթթու, և նույնիսկ նման մաքրումից հինգ րոպե հետո, սարքի հետ ամեն ինչ կարգին էր: Հաջորդ քայլը սմարթֆոնը ացետոն պարունակող լաքահանող միջոցով մաքրելն էր: Միայն դրանից հետո օլեոֆոբ շերտն իսկապես վնասվեց, չնայած սմարթֆոնը շարունակում էր աշխատել:
Նման փորձարկումներից հետո եզրակացությունը հետևյալն է. իրականում էկրանի ծածկույթն այնքան էլ հեշտ չէ վնասել, այնպես որ դուք կարող եք օգտագործել ալկոհոլ պարունակող հեղուկներ՝ սմարթֆոնների էկրանը մաքրելու համար: Այս կարծիքը կիսում է միկրոկենսաբան Չարլզ Գերբան, ով խորհուրդ է տալիս սրբել սարքերը խոնավ անձեռոցիկներով՝ թաթախված ալկոհոլի և ջրի լուծույթի մեջ` 40%-ը 60%-ի հարաբերակցությամբ:
Եթե դուք ամեն դեպքում վախենում եք էկրանը վնասելուց, ապա շատ ավելի անվտանգ միջոց կա. օգտագործեք պաշտպանիչ ապակի կամ ժապավեն և մաքրեք այն: Դրանցից շատերը օլեոֆոբիկ շերտ չունեն, իսկ դրանց փչանալը դժվար թե մեծ կորուստ լինի ձեզ համար: Միշտ կարող եք այն փոխարինել նորով՝ առանց հեռախոսի էկրանը վնասելու: