Կարդացին Առաջին կոսմետիկ միջոցներն ի հայտն են եկել մոտ 5000 տարի առաջ Հին Եգիպտոսում: Տղամարդիկ և կանայք իրենց աչքերն ընդգծում էին գծաներկով և դեմքը ծածկում սպիտակեցնող նյութերով: Իսկ մեր օրերում կանայք ունեն ընտրության մեծ հնարավորություն, քանի որ կոսմետիկ միջոցներն այնքան շատ են, որ դրանց անուններն անգամ դժվար է հիշել: Կարևորը դրանք ճիշտ օգտագործելն է, հակառակ դեպքում՝ գեղեցկությունն ընդգծելու փոխարեն, կարող եք կնճիռներ, անհարթություններ և տարօրինակ բծեր ստեղծել ձեր դեմքի վրա:
Դիմահարդար Նադեժդա Բիկուլովան պարզաբանում է, թե ինչ սխալներ են թույլ տալիս կանայք դիմահարդարման մեջ:
1. Նույն դիմահարդարումը և 20, և 40 տարեկանում
Դիմահարդարումը, որը սազում էր ձեզ 20 տարեկանում, կարող է փչացնել ձեր տեսքը 40 տարեկանում: Որքան մեծանում եք, այնքան ավելի զգույշ պետք է լինեք գծերի հարցում: Հստակ աղեղերը կարող են ընդգծել կոպերի կախվածությունն ու աչքերի շուրջ եղած կնճիռները, իսկ շրթունքների հստակ ուրվագիծը՝ բերանի շուրջ առաջացած կնճիռները:
Եթե չեք կարող հրաժարվել աղեղներից, ապա ավելի լավ է նախապատվությունը տալ ստվերավորված տարբերակներին:
2. Մաշկի տեսակը հաշվի չառնելը
Կոսմետիկա գնելիս պետք է հաշվի առնել ոչ միայն մաշկի գույնը, այլև դրա տեսակը`չոր, յուղոտ, նորմալ կամ խառը: Սխալ ընտրված տոնայինը կարող է ընդգծել մաշկի յուղոտ փայլը, բարակ բծերը և լայնացած ծակոտիները:
Եթե յուղոտ մաշկ ունեք, ընտրեք փայլատ երանգ, որը պարունակում է ցինկ կամ տիտանի երկօքսիդ, թեյի ծառի յուղ կամ հիալուրոնաթթու: Դիմահարդարման համար ավելի լավ է օգտագործել չոր միջոցներ՝ կարմրաներկ, կոնտուր և հայլայթ:
Չոր մաշկ ունեցողները պետք է ընտրեն փայլող տոնայիններ: Դրանք սովորաբար պարունակում են յուղեր, վիտամին E և SPF ֆիլտրեր: Չոր մաշկի դեպքում ընտրեք դիմահարդարման կրեմային միջոցներ:
3. Քողարկիչն ու հայլայթը մերկ մաշկին կիրառելը
Մեզանից ո՞վ չի երազում գեղեցիկ այտոսկրեր ու փայլուն մաշկ ունենալու մասին: Օգնության են հասնում քողարկիչները, հայլայթները, կարմրաներկը և մյուս կոսմետիկ միջոցները: Սակայն պետք է հիշել, որ այս ամենը պետք է կիրառել միայն տոնային հիմքի վրայից:
Շատ դժվար է մերկ մաշկի վրա որևէ կոսմետիկ միջոց տարածելը: Դրանք կարող են «կպչել», լղոզվել կամ հալչել դեմքի վրա: Եվ այս տեսարանը նյարդերից թույլ մարդկանց համար չէ:
4. Կարմրաներկ չօգտագործելը
Եթե դուք վախենում եք կարմրաներկից, քանի որ վախենում եք կարմրաթուշ ձյունանուշ դառնալուց, նշանակում է միշտ սխալ եք ընտրել ձեր կարմրաներկը:
Փոշոտ փողոցներում դեմքը խոնավեցման և պաշտպանության կարիք ունի: Ջրազրկված ու հոգնած մաշկը կարող է փչացնել նույնիսկ ամենագեղեցիկ դիմահարդարումը: Թարմ տեսք ունենալու համար օգտագործեք կարմրաներկ: Սա, իսկապես, պարտադիր բաղադրիչ է: Այն անհրաժեշտ է քսել ոչ միայն այտերին, այլ նաև քթի ծայրին և հոնքից փոքր-ինչ վերև: Այդ ժամանակ ձեր դեմքը կստանա թարմ տեսք և տոնուս:
5. Այտերը ձգելը
Բլոգերները խորհուրդ են տալիս այտոսկրերն ընդգծելու համար ձգել շուրթերն ու այտերի փոսիկները կոնտուրինգի միջոցով մգացնել: Սակայն դիմագծերը շտկելու այս եղանակը կարող է հակառակ ազդեցությունն ունենալ: Ծնոտը կերևա ավելի խոշոր, իսկ կզակը՝ ծանր: Դա պայմանավորված է նրանով, որ այտոսկրերի գիծը ավելի ցածր է լինում, քան իրականում է:
Հանգիստ և թույլ թողեք ձեր դեմքը, ափի եզրը դրեք այտոսկրի տակ և գտեք բնական խորությունը: Հենց դա է կոնտուրիգի գոտին: Քողարկիչը պետք է քսել ականջից սկսելով և բերանի անկյունների հատվածում լավ տարածել:
6. Ներքևի կոպը չներկելը
Ստորին կոպը ոչ միայն կարելի է ներկել, այլև անհրաժեշտ է: Այս տեխնիկան կդարձնի ձեր տեսքը ներդաշնակ, աչքերն՝ արտահայտիչ, և կուղղի կախված կոպը: Որպեսզի չծանրացնեք հայացքը և չփոքրացնեք աչքերը, մի ընդգծեք ստորին կոպը սև մատիտով կամ չափազանց մուգ ստվերաներկով: Ավելի լավ է օգտագործել նյուդ երանգների ստվերաներկեր, որոնք պետք է լավ տարածել:
7. Սկզբում քսում եք հիմքը, իսկ հետո՝ ստվերաներկ
Դիմահարդարումը ցանկալի է սկսել աչքերից, այնուհետև անցնել տոնայինին: Նույնիսկ ամենաթանկ ստվերաներկերը կարող են թափվել և «լղոզվել» կրեմի շերտի վրա: Նման հետքերը հեռացնելը շատ դժվար է. հարկավոր է դրանք քողարկել կամ հեռացնել միցելյար ջրով և նորից սկսել դիմահարդարումը:
Այդ պատճառով նախ ներկեք ձեր աչքերը, իսկ հետո վրձինով մաքրեք այն, ինչ թափվել է: Կարող եք նաև օգտագործել դիմահարդարման համար նախատեսված պատչեր:
8. Աչքերի գույն ստվերաներկեր ընտրելը
Այն գաղափարը, որ ստվերներկի գույնը պետք է նույնը լինի աչքերի գույնի հետ, վաղուց արմատացած է շատերի հիշողության մեջ: Բայց սա թյուր գաղափար է, իսկ ստվերներկը պետք է հակադրվի ծիածանաթաղանթի գույնին:
• Կապույտ աչքերին համապատասխան են ստվերաներկի մանուշակագույն, պղնձագույն և ոսկեգույն երանգները:
• Կանաչ աչքերին համապատասխան են ստվերաներկի շագանակագույն, շոկոլադե, դեղձի և սալորի գույն ունեցող ստվերաներկերը:
• Շագանակագույն աչքերին համապատասխան են սալորի, կոբալտի, յասամանի գույները, մուգ կանաչը, փոշոտ վարդագույնը և ոսկեգույնը:
9. Թարթիչաներկը վրձինի վեր ու վար շարժումով վերցնելը
Շատ թարթչաներկ վերցնելու և թարթիչները լավ ներկելու համար շատ աղջիկներ խոզանակը մի քանի անգամ մտցնում են խողովակի մեջ և արագ հանում: Այդպես չպետք է անել. մեծ քանակությամբ օդը ներթափանցվում է թարթիչաներկի մեջ և այն ավելի շուտ է չորանում, փչանում և գնդիկներ առաջացնում: Նաև խոզանակը կարող է վնասվել, իսկ դրա վրայի մազիկները՝ կոտրվել:
Թարթիչաներկը վրձինի վրա հավաքելու համար խոզանակը մի քանի անգամ պտտեք խողովակի մեջ և զգուշորեն հանեք:
10. Սև թարթիչաներկ օգտագործելը
Առանց թարթիչաներկ ոչ մի դիմահարդարում ամբողջական չի լինի: Միայն թե այն սխալ ընտրելու դեպքում կարող եք փչացնել ձեր դիմահարդարումը և ծանր ու հոգնած դարձնել ձեր տեսքը: Եվ խոսքը ոչ թե գնդիկների ու թարթիչների կպչելու մասին է, այլ՝ թարթիչաներկի գույնի:
Սև թարթիչաներկը սազում է թխահեր կամ շագանակագույն մազերով կանանց: Եթե ունեք բաց շագանակագույն մազեր և սառը, բաց գույնի աչքեր, ապա ուշադրություն դարձրեք մոխրագույն թարթիչաներկերին: Մաշկի տաք երանգներով, կանաչ և բաց շագանակագույն աչքերով աղջիկների համար հարմար է շագանակագույն կամ սուրճի գույնով թարթիչաներկը:
11. Թարթիչները կոտրելը
Թարթիչները կոտրելու մեջ սարսափելի ոչինչ չկա: Հիմնական սխալը` թարթիչները թարթիչաներկ քսելուց հետո ոլորելն է: Սա կարող է վնասել կամ նույնիսկ կոտրել ձեր թարթիչները: Թարթիչաներկը չորանում է և թարթիչները դարձնում փխրուն: Այդ նույն պատճառով, չի կարելի մատներով հեռացնել թարթիչների վրայի գնդիկները:
12. Բամբակյա սկավառակով դեմքը տրորելը
Այս սխալը կապված է դիմահարդարումը հեռացնելու հետ: Կարիք չկա ուժեղ հպվել դեմքին` դիմահարդարումը մաքրելու համար: Այդպես դուք ձգում և վնասում եք ձեր մաշկը: Պետք է միցելյար ջուրով թրջել բամբակյա սկավառակը, նրբորեն քսել այն դեմքին և սպասել մի քանի վայրկյան: Այսպիսով, ավելի արագ կհեռացնեք դիմահարդարումը և չեք վնասի մաշկը:
Դիմահարդարման այս սխալներից ո՞րն եք հաճախ թույլ տվել: Կիսվեք մեզ հետ մեր ֆեյսբուքյան կամ ինստագրամյան էջի մեկնաբանություններում: