Կարդացին Որոշ դիզայներներ պնդում են, որ 10 տարի հետո մենք կրելու ենք բոլորովին այլ հագուստ: Եվ խոսքը նորաձևության մասին չէ:
Պատկերացրեք, թե ի՞նչ կլինի, եթե մի օր այլևս տարբերություն չլինի տղամարդկանց և կանանց հագուստի միջև, եթե չլինեն հագուստի տարբեր չափսեր: Փոխարենը լինի հագուստի մի մոդել, որը միաժամանակ համապատասխանում է բոլորին՝ թե տղաներին, թե աղջիկներին, թե ցածրահասակ, թե բարձրահասակ մարդկանց: Եվ ամենակարևորը, այս տեսակ հագուստը կարժենա ավելի քիչ, քան մի բաժակ կապուչինոն: Եթե թռչող մեքենաների մասին դեռ վաղ է խոսել, ապա թվային հագուստն արդեն նվաճում է գեղեցկության և նորաձևության ոլորտը:
Այսպիսով, եկեք հասկանանք, թե ինչ են իրենցից ներկայացնում թվային աշխարհի զգեստները, ինչու են դրանք քննարկման առարկա և ինչ կապ ունեն դրանք նորաձևության ապագայի հետ:
Ինչ է թվային հագուստը
Խոսքը այն հագուստի մասին է, որը գոյություն չունի իրական աշխահում. այն գոյություն ունի և հնարավոր է այն կրել միայն թվային միջավայրում: Ավելին, այս տեսակ հագուստը նույնպես հնարավոր է գնել: Օրինակ, օնլայն խաղերի սիրահարները գիտեն, որ խաղի մեջ հնարավոր է խաղի հերոսների համար գնել զենք ու զրահ իրական գումարով և օգտագործել:
Նույնն էլ թվային հգուստի դեպքում է, սակայն այս թվային հագուստը ոչ թե խաղերի կերպարների համար է, այլ՝ իրական մարդկանց: Հաճախորդները վճարում են իրենց հավանած ապրանքի համար, ուղարկում են իրենց լուսանկարները դիզայներներին, և, ուշադրություն, տեղի է ունենում հետևյալը. դիզայներները՝ օգտագործելով 3D տեխնոլոգիաները, լուսանկարի մարդուն հագցնում են գնված հագուստը: Արդյունքը կարող եք տեսնել այս լուսանկարում.
Ի դեպ, վերոնշյալ լուսանկարի բաճկոնը պատկանում է սկանդինավյան Carling ապրանքանիշին, որն աշխարհում առաջինը սկսեց վաճառել վիրտուալ հագուստ: Այս ապրանքանիշի օնլայն խանութում ցուցադրվում է ինչպես իրական հագուստ, այնպես էլ՝ համակարգչային մոդելներ: Նման հագուստն արժե 9-ից 30 դոլար: Առաջին խմբաքանակն էլ արդեն ամբողջությամբ վաճառվել է:
Ինչի համար է մարդկանց պետք վիրտուալ հագուստ: Ահա 4 պատճառ
Դեռևս մի քանի տարի առաջ թվային հագուստը հետաքրքրում էր միայն 3D մոդելներ մշակողներին և այդ ոլորտի աշխատակիցներին: Սակայն այժմ իրավիճակն այլ է: Մարդիկ ավելի ու ավելի շատ են ուշադրություն դարձնում վիրտուալ իրերին, և ահա թե ինչու.
1. Շատերն են այսօր օգտվում Instagram-ից: Հաճախ մարդիկ ուզում ենք ցուցադրել իրենց հետևերդներին մի յուրօրինակ բան և զարմացնել նրանց: Իսկ ի՞նչը կարող է ավելի արտասովոր լինել, քան վիրտուալ հանդերձանքը: Առավել ևս, որ սա լավ միջոց է ոճն ու կերպարը թարմացնելու, հագուստի մեջ նոր էքսպերիմենտներ կատարելու համար:
Instagram-ում #addressthefuture հեշթեգով այժմ կարելի է գտնել ավելի քան 200 հրապարակում, որոնց հեղինակները չեն թաքցնում, որ իրենք կրում են թվային հագուստ:
2. Վիրտուալ հագուստ կրելը կարող է գումար խնայելու լավ միջոց լինել, հատկապես նորաձևության ոլորտում: Հաճախ բացառապես ֆոտոշարքերի համար ձեռք է բերվում նոր հագուստ, որը հետո այդպես էլ մնում է պահարանում կախված: Իսկ թվային հագուստը, չնայած ոչ ամբողջովին, կարող է փրկել աշխարհն այսպես կոչված մեկանգամյա օգտագործման հագուստից:
3. Սա կարող է ազդել նաև շրջակա միջավայրի իրավիճակի վրա աշխարհում: Համարվում է, որ նորաձևության ոլորտն արդեն իսկ սպառնալիք է մոլորակի էկոլոգիայի համար: Արտադրության համար պահանջում է մեծ քանակությամբ քաղցրահամ ջուր և ջերմոցային գազերի արտանետումների 10%-ը բաժին է ընկնում հենց նորաձևության ոլորտին: Նորաձևության տները դարձել են թափոնների՝ 3 խոշոր արտանետողներից մեկը աշխարհում: Եզրակացությունը պարզ է. քիչ հագուստ, քիչ խնդիրներ:
4. Սա ներդրում է ապագայի համար: Վերոնշյալ նկարում պատկերված վիրտուալ զգեստը ստեղծվել է Fabricant նորաձևության տան կողմից և այն վաճառվել է աճուրդում 9,5 հազար դոլարով: Այս զգեստը Quantstamp ընկերության գործադիր տնօրեն Ռիչարդ Ման գնել է որպես նվեր իր կնոջ համար: Նրա կարծիքով՝ 10 տարի հետո բոլոր մարդիկ կրելու են թվային հագուստ, և թվային հագուստի արժեքը բարձրանալու է տասնյակ անգամներ, ուստի հիմա նման զգեստ գնելը խելամիտ քայլ է:
Ուրեմն ի՞նչ է լինելու ապագայում
Կարելի է եզրակացնել, որ շուտով մեր իրական զգեստապահարաններում կմնան միայն հիմնական իրեր ու հագուստներ, իսկ բոլոր յուրահատուկ իրերը կլինեն թվային ձևաչափով: Պատճառն էլ այն է,որ թվային հագուստն ավելի էժան է, էկոլոգիապես մաքուր և յուրաքանչյուրին հնարավորություն է տալիս գոնե մեկ անգամ կրել բարձր նորաձևության տների արտադրանք: Մնում է միայն սպասել և զինվել վիրտուալ հագուստի պաշարներով:
Հավատու՞մ եք նորաձևության այսպիսի ապագային: Անպայման գրեք ձեր կարծիքը մեկնաբանություններում: