Կարդացին Բազային զգեստապահարանը նորաձևության աշխարհի ամենաօպտիմալ լուծումներից է։ Այն կլասիկ իրերի հավաքածու է (մեծամասամբ ոչ թանկարժեք), որոնք հեշտ է համադրել ցանկացած հագուստի հետ։
Բազային զգեստապահարան հավաքելիս կարևոր է հիշել մի քանի պարզ կանոն․
Հագուստը պետք է հարմար լինի Ձեր կենսակերպին
Ցանկացած հագուստ պետք է առաջին հերթին հոգեբանորեն հարմար լինի կրողի համար։ Եթե Դուք երիտասարդ մայրիկ եք և հարմարավետ եք զգում սպորտային ոճում, Ձեր բազային զգեստապահարանի էլեմենտները չեն կարող լինել նեղ, կիպ կիսաշրջազգեստները կամ բարձրակրունկ կոշիկները։
Բազային են բոլոր այն իրերը, որոնք առանց նայելու կարող եք համադրել միմյանց հետ և միևնույն ժամանակ հարմարավետ ու գեղեցիկ զգալ ինքներդ Ձեզ։
Ուստի ժամանակ և գումար մի վատնեք այն իրերի վրա, որոնք չեն համապատասխանում Ձեր կենսակերպին։
Ընտրեք Ձեզ սազական հագուստ, այլ ոչ՝ այն, ինչ մոդայիկ է
Նորաձևությունն այնքան արագ է փոփոխվում, որ չես հասցնում հասկանալ, իսկ ի՞նչն է այսօր մոդայիկ։ Միշտ հիշե՛ք, որ նորաձև է այն, ինչը սազում է Ձեզ և Ձեր կազմվածքին։
Պետք չէ նորաձևության հետևից ընկնելով մոռանալ սեփական էության մասին։
Ամեն ինչ անցողիկ է, բայց կլասիկան հավերժ է
Կլասիկ, բազային իրերը մոդայիկ են ցանկացած ժամանակաշրջանում։
Առանց վարանելու կարող եք պահարանից հանել մի քանի տարվա սև, փոքրիկ զգեստը և համադրելով գեղեցիկ աքսեսուարի հետ կրել որևէ երեկոյի ժամանակ։
Ընտրե՛ք որակով իրեր
Բազային պահարանի իրերը Ձեզ պետք է ծառայեն մի քանի տարի ուստի աշխատեք ընտրել հագուստ որակյալ կտորներից։
Յուրաքանչյուր նոր հագուստ պետք է համադրվի առնվազն 3 հին հագուստների հետ
Եթե հագուստ գնելիս մտքում չեք կարողանում պատկերացնել համադրությունը, ապա ավելի լավ է չգնեք այն։ Գեղեցիկ և սազական համադրությունը դժվար չէ մտովի պատկերացնել։